Җәмгыять 25 гыйнвар 2005 12:57

^Ватиканда татар эшкуары акчаларына Коръәннең уникаль бүләк басмасы нәшер ителгән

Скопировать ссылку

(Мәскәү, 25 гыйнвар, «Татар-информ», Динә Галәветдинова). Ватикан типографиясендә 1,5 мең нөсхә тираж белән Мәскәүнең «Белый город» нәшрияты әзерләгән Коръәннең уникаль бүләк басмасы дөнья күргән. Мөселманнарның изге китабының бүләк басмасын чыгару фикерен «Папирус» компаниясе директоры һәм «Татарские новости» газетасы мөхәррире Ильяз Мөслимов тәкъдим иткән, ул проектны финанслауны да үз өстенә алган.

Россиянең Мөфтиләр шурасы рәисе Равил Гайнетдин киңәшен тотып, яңа басманың нигезенә Согуд Гарәбстаны короле хәзрәткә бүләк иткән Коръәнне алганнар. Дөньядагы иң кечкенә дәүләт нәшриятына мөрәҗәгать итүнең сәбәбе шунда ки, Россиядә китапны таркатмыйча гына сканерлый алмаганнар һәм Коръәнне бизәгндә кулланылган буяулар, алтын һәм көмеш бирә торган якты шәүләләрне бетерә алмаганнар. Ватикан нәшриятчылары югары технологияләрдән тыш, гарәп телен һәм Коръәнне яхшы белгән белгечләр дә тәкъдим иткән.

«Белый город» нәшрият йортының генераль директоры К.Чеченова Коръән, югары сыйфатлы полиграфия ярдәмендә, мәңге саклана ала, дип исәпли. Басманың тышлыгы өчен бәрән тиресе кулланылган. Бар китаплар да табигый җепләр белән кулдан тегелгән. Коръән сатуга 15 мең сум бәя белән чыгачак, дип ниятләнә.

Сәхифәләр

^Ватиканда татар эшкуары акчаларына Коръәннең уникаль бүләк басмасы нәшер ителгән