Ватан сугышчылары гаиләләре комитеты госпитальдә яраланган хәрбиләр янында булды
Бүген Казанның хәрби госпиталендә үзенчәлекле концерт булды. Яралы хәрбиләр алдында мәктәп укучысы Тимур Сафин чыгыш ясады һәм алар өчен гитарага кушылып җырлар башкарды. Бу хакта «Татар-информ» хәбәрчесе Кирилл Гомәров яза.
Тимур сөйләгәнчә, аңа мондый игелекле эшләр белән шөгыльләнү һәм Ватан сакчылары белән бер компаниядә булу ошый.
«Мин госпитальләрдә һәм хәрби частьләрдә 2022 елдан бирле чыгыш ясыйм. Ә 2024 елдан башлап әти белән махсус операция зонасына йөрибез. Тулаем алганда, җиде тапкыр бардык инде. Миңа безнең хәрбиләргә булышу ошый. Мин алар белән горурланам», – дип сөйләде Тимур Сафин.
Фото: © Кирилл Гомәров, «Татар-информ»
Аның чыгышы алдыннан сәламләү сүзләре белән Татарстанның Ватан сугышчылары гаиләләре комитеты вәкилләре чыгыш ясады. Очрашу сугышчыларга ярдәм итү һәм аларга Тимурны тәкъдим итү өчен оештырылган иде. Алар комитетның чаралар оештыру һәм махсус операциядә катнашучыларның гаиләләренә ярдәм күрсәтү белән шөгыльләнүе турында сөйләде. Шулай ук сугышчыларга футболка һәм оекбашлардан җыелмалар өләштеләр.
«Безнең комитет 2022 елның ноябрендә оешты. Эш махсус операциядә катнашучыларның гаиләләренә булышуга юнәлгән. Махсус операция башыннан бирле мин нәрсә белән файдалы була алам икән дип уйландым. Һәм менә без хәрбиләрнең хатыннары белән терәк һәм әлбәттә, ышанычлы тыл булу өчен бер оешмага җыелдык», – дип сөйләде Татарстанның Ватан сугышчылары гаиләләре комитеты җитәкчесе Ангелина Галимова.
Фото: © Кирилл Гомәров, «Татар-информ»
Хәрбиләр белән мондый очрашулар госпитальдә еш була. Әлеге госпиталь 50 урынга исәпләнгән, чыгыш вакытында барлык хәрбиләр дә палаталарыннан чыккан иде.
Баш табибның гомуми мәсьәләләр буенча урынбасары Эльза Сәхәпова сүзләренчә, госпиталь эшләгән дәвердә анда якынча 1100 хәрби дәваланган.
Фото: © Кирилл Гомәров, «Татар-информ»
«Нигездә безнең пациентлар – мина шартлауда яраланган пациентлар, шулай ук без микрохирургия операцияләре дә ясыйбыз. Алар белән комплекслы хезмәт, шул исәптән психологлар да эшли», – диде ул.