Васил Шәйхразиев Нижневартовскида татар балалары укыган мәктәптә булды
Кунакларга балалар әзерләгән “Әбиемнең күңел сандыгы” концерт программасы тәкъдим ителде.
(Казан, 21 апрель, "Татар-информ"). Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразиев бүген Нижневартовск шәһәренең 11 номерлы урта белем бирү мәктәбе белән таныша. Бу турыда Бөтендөнья татар конгрессы матбугат хезмәте хәбәр итте.
Әлеге мәктәп базасында татар якшәмбе мәктәбе, татар теле курслары эшләп килә. Монда балалар татар теле белән бергә халкыбызның гореф-гадәтләрен дә өйрәнә.
Якшәмбе мәктабендә балалар икегә бүленгән: 3-7 яшьлекләр һәм 8-12 яшьлекләр. Барлыгы 35 бала белем ала. Аларны Гүзәлия Нурфәиз кызы Халикова һәм Илсөяр Ямалиева укыта.
Кунакларга балалар тарафыннан әзерләнгән “Әбиемнең күңел сандыгы” концерт программасы тәкъдим ителде.
