Васил Шәйхразыев эшмкәрләрдән эш урынын булдыруда татарларга ярдәм итүне сорады
Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев эшмәкәрләргә татар кешеләренә эш урынын булдыруда ярдәм итүләрен сорады. Бу хакта ул Бөтендөнья татар конгрессының XIII Бөтенроссия татар авыллары эшмәкәрләре җыены ачылышында әйтте.
«Бүген авылда кем эшләргә тиеш соң, дигән сорау туа. «Авыл» төшенчәсенең мәгънәсе дә үзгәрә бит. Мәсәлән, безнең авыл акрынлап кына ял итү үзәгенә әйләнеп бара. Чөнки апа-абыйлар олыгайды, малларын суйды, кемдер тавыклар да тотмый. Кешеләр бүгенге көндә дача сатып алмый, чөнки авылда газ, су кергән, бакчасы бар. Карыйсың, икенче бер авылда бөтен җирдә утлар яна, үзбәк сыер савып йөри, таҗик тракторчы булып эшли. Шуңа күрә эш урыннарын булдыруда да үзебезнең татарларга ярдәм итәсе иде», – дип киңәш итте ул.
Васил Шәйхразыев күптән түгел Адыгея Республикасына барып кайтуларын, анда татар авылларының торышын, халкын күргәнен әйтте. «Красноярск краенда да татарлар белән очраштык. Күп кенә җирләрдә татарлар авторитетлы: хакимият каршында да, башка милләт каршында да. Башкортстан, Оренбург, Самара, Ульяновск, Ижевск, Чиләбе дибезме, һәр җирдә татар авыллары бар, тырышып, яшәп, эшләп яталар», – диде Милли Шура рәисе.
«Бер-беребезне югалтмыйча, үсешләрне күреп, рәхмәтле булып яшик. Бүген без балаларга, оныкларга телне, динне бирәбезме? Кайвакыт: «Безгә авыр», – дибез. Әти-әниләргә, әби-бабайларга җиңел булганмы? Бүген Татарстанда гына да 1510 мәчет бар. Өлкәләргә барганда, рәхәтләнеп, мәчетләргә керәбез. Мөфтиләрнең күбесе – татар, җомга намазында татарлар юк диярлек, дибез. Икенче яктан караганда, якшәмбе мәктәпләре татарлыкны саклап кала, милләттәшләребез зур эш эшли, һәм мин аның өчен рәхмәт әйтәм», – диде ул.