Фән һәм мәгариф 24 апрель 2008 19:20

Варислар Тукай эзләре буйлап сәяхәткә чыга

Экспедициядә 200 варис – республика бәйгеләрендә җиңүчеләр катнаша

Скопировать ссылку

(Казан, 24 апрель, "Татар-информ", Римма Гатина). Иртәгә - 25 апрельдә республика варислары татар халкының яраткан шагыйре Габдулла Тукайның ватанына юл ала. ТР Мәгариф һәм фән министрлыгының матбугат хезмәте хәбәр иткәнчә, "Татарстан варислары берлеге" әгъзалары ике көн буена Арча-Кырлай-Кушлавыч-Арча маршруты буенча хәрәкәт итәчәк.
ТР Мәгариф һәм фән министрлыгы, "Татарстан варислары берлеге" иҗтимагый берләшмәсе белән берлектә оештырылган җәяүле сәяхәт Гаилә елына һәм Татарстан пионериясенең 85 еллыгына багышлана.
Экспедициядә 200 варис – республика бәйгеләрендә җиңүчеләр катнаша. Аларны бөек татар әдибенең мирасы, аның яшәгән һәм иҗат иткән урыннар белән таныштыру максаты куела.
Мирасчылар Тукай-Кырлай авылына юл уңаенда Арча районының Әдәбият-туган якны өйрәнү, Арча педагогика көллиятендәге "Әлифба" музейлары белән танышачак. Арчада шигырь бәйрәмендә катнашачак, шагыйрьнең Кырлай авылындагы музеенда булачак, Кушлавыч авылында әтисенең каберен зыярат кылачак.

Сәхифәләр

Варислар Тукай эзләре буйлап сәяхәткә чыга