Зилә Вәлиева: Җәмәгать күзәтүчеләре Татарстанда легитим сайлаулар сагында тора

Бердәм тавыш бирү көнендә Татарстанның барлык сайлау участокларында җәмәгать күзәтүчеләре эшли. Аларның бурычы – сайлаучыларга ярдәм итү. Бу хакта бүген журналистларга ТР Иҗтимагый палатасы рәисе Зилә Вәлиева хәбәр итте.

«Күзәтүчеләр күп. Партияләрдән, кандидатлардан күзәтүчеләр бар. Татарстан Иҗтимагый палатасыннан күзәтүчеләр гомумән эшнең модераторлары булып тора. Әлбәттә, без бүген җәмәгать күзәтүчеләребез белән элемтәдә булачакбыз. Барлык иҗтимагый һәм муниципаль советлар шулай ук участокларда актив эшли», - дип сөйләде ул.

Республикада 13 августтан 5 сентябрьгә кадәр 2,8 меңгә якын кеше махсус өйрәтелде. Вәлиеваның мәгълүматларына караганда, җәмәгать күзәтүчеләре сайлаулар һәм сайлаучылар сагында тора, кешеләр өчен барлык мөмкинлекләр булсын, сайлауларның легитимлыгы тәэмин ителсен өчен тырыша.

«Якын арада беренче өч сәгатьнең нәтиҗәләре әзер булыр, дип ышанам. Без, беренче чиратта, муниципаль берәмлекләрнең иҗтимагый советларының рәисләре һәм, әлбәттә, күзәтүчеләребез белән элемтәдә торабыз. Күзәтүчеләр барлык шәһәрләргә һәм районнарга, шул исәптән Мәскәүдәге экстерриториаль участокка җибәрелде. Мәскәү белән 13:00 сәгатьтә тоташабыз», - дип билгеләп үтте ул.

Җәмәгать күзәтүе штабы Казанда ТР Иҗтимагый палатасында эшли. Анда республиканың күп кенә иҗтимагый оешмалары вәкилләре катнаша. Республика районнарында эшләүче җәмәгать күзәтүчеләре белән көн дәвамында 10:00, 13:00, 16:00 һәм 19:00 сәгатьләрдә элемтәгә керәчәкләр. Иртәнге 10:00 сәгатьтә Казан, Югары Ослан, Лаеш, Аксубай һәм Алабуга районнары белән элемтәгә керү булды.

Штаб вәкилләре арасында гражданлык катнашуы мәктәбен узучы яшьләр дә бар. Алар ситуатив үзәк вәкилләре белән элемтәдә тора.

«Алар үзләре тавыш бирде, хәзер аларның бурычы – ярдәм һәм консультация кирәк булган кешеләр белән элемтәдә булу», - дип аңлатты Вәлиева.

«Россия юристлары ассоциациясе» территориаль төбәк бүлеге башкарма комитеты рәисе Тимур Какохо сөйләгәнчә, ситуатив үзәк иртәнге 6:30 сәгатьтә эшли башлаган.

«Һәр участокта иртәнге 7:00 сәгатьтән җәмәгать күзәтүчеләре эшли. Сайлау участогы вакытында ачылганмы, тавыш бирү процессы ничек бара – әлеге мәгълүматны күзәтүчеләр ситуатив үзәккә җибәрә. Әлеге эшчәнлекнең нәтиҗәләре турында мәгълүматны социаль челтәрләрдә, Иҗтимагый палата мәйданчыгында, шул исәптән бәйсез җәмәгать мониторингы федераль платформасында урнаштырабыз», - диде Какохо.

Бүген, 14 сентябрьдә, Татарстанда Бердәм тавыш бирү көне уза. Республика халкы Татарстан Рәисен сайлый. Шулай ук 18нче номерлы Мәләкәс округы буенча Дәүләт Советы депутаты һәм 7,5 меңнән артык муниципаль депутат сайлана.

Татарстан Рәисен сайлауда дүрт кандидат катнаша (алфавит тәртибендә): Рөстәм Миңнеханов («Бердәм Россия»), Хафиз Миргалимов (КПРФ), Виталий Смирнов («Социаль гаделлек өчен Россия пенсионерлар партиясе») һәм Руслан Йосыпов (ЛДПР).

Муниципаль сайлауларда катнашучыларның рекордлы саны теркәлгән – 11,4 меңнән артык кандидат. Алар арасында төп партияләр вәкилләре һәм үз-үзен тәкъдим итүче буларак катнашучы 2,6 меңнән артык кеше.

Татарстанда тавыш бирү өчен 2752 участок ачылды. Участоклар 7:00 сәгатьтән 20:00 сәгатькә кадәр эшләячәк.

«ТНВ-Татарстан» һәм «ТНВ-Планета» телеканалларында 14 сәгатьлек «Мин яратам сине, Татарстан!» телемарафоны уза. Ул 22:00 сәгатькә тәмамланачак.

Эфирда сайлау участокларыннан репортажлар күрсәтелә. Студиядә экспертлар, сәясәтчеләр һәм артистлар чыгыш ясый. Шулай ук «Татарстан Алга» фотоконкурсына йомгак ясала – эфирда 2 Sollers ST8 автомобиле һәм 11 iPhone 16 смартфоны уйнатыла.