Ваһапов фестивалендә шоу-бизнес өчен уңайлы җырчы гран-при алды – Искәндәр Биктаһиров
Рәшит Ваһапов исемендәге XIII халыкара татар җыры фестиваленең гала-концерты үтте.
(Казан, 16 май, «Татар-информ», Рузилә Мөхәммәтова). Рәшит Ваһапов исемендәге XIII халыкара татар җыры бәйгесенең гала-концертын тамаша кылган Татарстанның халык артисты Искәндәр Биктаһиров “Татар-информ” хәбәрчесе белән сөйләшкәндә, бәйгедә шоу-бизнес өчен уңайлы җырчының җиңгәнлеген билгеләп узды.
Исегезгә төшерәбез, фестивальнең Гран-приына яшь җырчы, Казан дәүләт мәдәният һәм сәнгать институты студенты, профессор Венера Ганиева укучысы Ранис Габбазов лаек булды. Гала-концертта җырчы Татарстанда тыңлап өйрәнелгән “Сарман”ны түгел, ә бәлки бу җырның башкачарак төрен башкарды.
“Шулай да мин академик вокалга ия җырчы Ярамир Низаметдинов гран-при алыр, бәлки, дип өметләнгән идем”, - диде Искәндәр Биктаһиров.
Ярамир Низаметдинов Казан дәүләт консерваториясе студенты, драматик тенор. Гала-концертта Н.Җиһановның “Җәлил” операсыннан Җәлил ариясен башкарды.