Татарстанда барлык маркадагы бензин һәм дизель ягулыгы арзанайды
Татарстанда узган атнада барлык маркадагы бензинга һәм дизель ягулыгына бәяләр төште. Росстат мәгълүматларында шулай диелә.
Аерым алганда, АИ-92 маркалы бензин 3 августтан 10 августка кадәр 1,04 сумга (литры 68,85 сумнан 67,81 сумга кадәр) арзанайды. Үз чиратында, АИ-95 маркалы бензинның бәясе 15 тиенгә (литры 73,43 сумнан 73,28 сумга кадәр) кимеде. Алдагы атна белән чагыштырганда, АИ-92 һәм АИ-95 маркалы бензин бәясенең кимү темпы акрынайды.
Шуның белән бергә, июль ахыры – август башында кыйммәтләнгән премиаль маркалы бензин (АИ-98 һәм аннан югарырак) һәм дизель ягулыгы арзаная башлады. Әйтик, АИ-98 һәм аннан югарырак бензинның бәясе - 36 тиенгә (литры 99,42 сумнан 99,06 сумга кадәр), ә дизель ягулыгы 29 тиенгә (литры 80,56 сумнан 80,27 сумга кадәр) төште.
Татарстанда автомобиль бензинының уртача бәясе 61 тиенгә (литры 71,54 сумнан 70,93 сумга кадәр) арзанайды.