Казанның 7нче хастаханәсендә бавыр күчереп утырта башладылар
Казан М.Н.Садыйков исемендәге 7нче шәһәр хастаханәсендә бавыр күчереп утырту буенча операцияләр ясый башладылар. Беренче донор органы Түбән Камада яшәүче хатын-кызга (анда циррозның иң соңгы стадиясе булган) күчереп утыртылды.
Операциядә шулай ук Республика клиник хастаханәсе һәм Республика клиник онкология диспансеры табиблары да катнашты.
«Татарстанда трансплантация программасы киңәергә тиеш. Ул күләмнәрне арттыруны гына түгел, ә республиканың башка клиникаларында трансплантация программаларын булдыруны да күздә тота», – дип искәртте ТР Сәламәтлек саклау министрлыгының штаттан тыш баш белгеч-трансплантологы Андрей Киршин.
Искәртеп үтәбез, узган ел 7нче шәһәр хастаханәсендә йөрәк һәм бөер күчереп утырту буенча операцияләрне үзләштерделәр.