Казанда узган гомумшәһәр өмәсендә 50 меңгә якын кеше катнашкан
25 апрельдә Казанда санитар чистарту һәм төзекләндерү икеайлыгы кысаларында гомумшәһәр өмәсе узды. Анда 50 меңнән артык кеше катнашты. Шәһәрнең Тышкы төзекләндерү комитеты рәисе Альберт Шәйнуров эшлекле дүшәмбедә шул хакта хәбәр итте.
Ул ачыклык керткәнчә, бер көн эчендә 1,4 миллион квадрат метр юл һәм 1,5 миллион квадрат метр яшел зона тәртипкә китерелгән, 14 рөхсәтсез чүплек бетерелгән, 9 мең кубометрдан артык чүп чыгарылган. 2 меңгә якын ишегалды тәртипкә китерелгән.
Эшләр шәһәрнең барлык районнарында да алып барылган: яр буе зоналары, урман полосалары, сәнәгать территорияләре һәм ишегаллары чистартылган. Урицкий һәм «Савиново» паркларында 100дән артык Себер эрбете утыртканнар.
Шәйнуров сүзләренчә, өмә 1 апрельдә башланган санитар чистарту һәм төзекләндерү икеайлыгының бер өлеше булды. Бу вакыт эчендә Казанда 17 миллион квадрат метрдан артык юл, шулай ук шәһәр инфраструктурасының меңләгән элементлары тәртипкә китерелгән инде.