Түбән Кама табиблары ир-атның ашказаныннан берничә вак акча алган
Түбән Кама табиблары пациентның ашказаныннан берничә тәңкә – вак акчалар алган. Бу хакта Түбән Кама үзәк район күп профильле хастаханәсенең матбугат хезмәте хәбәр итә.
Хастаханәнең 2нче терапия бүлегенә, анемиядән шикләнеп, бер пенсионер килгән. ФГДС (фиброгастродуоденоскопия) үткәргән вакытта табиб-эндоскопист Александр Комаров һәм шәфкать туташы Әлфия Хәмидуллина ашказанында үзенчәлекле табышка – вак акчаларга юлыккан.
Сораштыру барышында ачыкланганча, ир-ат тәңкәләрне ике ел чамасы элек йоткан булган һәм аларның табигый юл белән чыгуына өметләнгән. Шул вакыт эчендә алты тәңкә оксидлашырга өлгергән.
Табиб пациентның ашказаныннан акчаларны икешәрләп чыгарган. Хәзер ир-ат дәвалау курсы уза.