Чаллыда Гадәттән тыш хәлләр министрлыгының шәһәр идарәсенә яңа башлык билгеләнде
Автокала мэры Наил Мәһдиев аппарат киңәшмәсендә Татарстан Республикасы Гадәттән тыш хәлләр министрлыгының Чаллы шәһәре муниципаль берәмлеге буенча идарәсенә яңа башлык тәкъдим итте. Татарстан Гражданнар оборонасы эшләре һәм гадәттән тыш хәлләр министрлыгы боерыгы белән бу вазифага Игорь Руцкий билгеләнде.
Яңа җитәкчене тәкъдим итеп, Наил Мәһдиев Руцкийның гражданнар оборонасы һәм янгын куркынычсызлыгы өлкәсендә зур тәҗрибәгә ия булуын билгеләп үтте.
«Дәүләт янгын сүндерү хезмәте органнарында билгеле бер эш тәҗрибәсе булган кеше КАМАЗ бүлекчәләренең берсендә гражданнар оборонасы һәм гадәттән тыш хәлләр штабы башлыгы вазифасын башкарды», - диде мэр.
Мәһдиев хәбәр иткәнчә, ул узган атнада Татарстан Гражданнар оборонасы эшләре һәм гадәттән тыш хәлләр министрлыгы җитәкчелеге белән яңа башлык хәл итәргә тиешле төп бурычлар турында фикер алышкан.
«Бу саклау корылмаларының торышына да, шәһәр халкына белем һәм мәгълүмат бирү мәсьәләләренә дә кагыла. Махсус хәрби операция дәвам итә, без республикабыз территориясендә нинди вакыйгалар барганын күрәбез. Шуңа күрә бурычлар шактый җитди - бергәләп хәл итәчәкбез», - дип искәртте Мәһдиев.
Игорь Руцкий 1964 елның 2 июнендә Мурманск өлкәсендә туган. Аның өч югары белеме һәм инженер-физик-теплоэнергетик, «Янгын куркынычсызлыгы» белгечлеге буенча техник һәм юрист квалификациясе бар.
Руцкий 20 елдан артык хокук саклау органнарында җитәкче вазифалар биләде. Әлеге вазифага билгеләнгәнче «КАМАЗ» ГАҖ Мәгълүмат-коммуникация технологияләре үзәгенең гражданнар оборонасы һәм гадәттән тыш хәлләр штабын җитәкләде.
I, II һәм III дәрәҗә «Хезмәттәге казанышлары өчен» медальләре белән бүләкләнгән.