Дәүләт Советында сугыш хәрәкәтләре ветераны статусын яңадан карарга тәкъдим иттеләр
Казанда ТР Дәүләт Советының һәм РФ Дәүләт Думасының профильле комитетлары оештырган түгәрәк өстәлдә гражданнарның яңа категорияләренә сугыш хәрәкәтләре ветераны статусын алу хокукын бирергә кирәк дигән тәкъдим җиткерелде. Татарстанда «Россия офицерлары» Бөтенроссия оешмасы Президиумы рәисе Сергей Липовой шундый тәкъдим белән чыкты.
Ул ветераннар турындагы Федераль законга төзәтмәләр кертү кирәклеге турында белдерде. Аның искәртүенчә, бүгенге көндә закон нигезендә ветеран статусы, Әфганстан һәм Сирияне дә кертеп, бары тик биш сугыш һәм конфликт өчен генә беркетелгән. Шул ук вакытта, аның сүзләренчә, бөтен ил буенча 35 ветеран оешмасы судлар аша танылуга ирешә.
Липовой мәгълүматлары буенча, 2000 елга 230-250 мең шундый ветеран исәпләнгән, һәм аларның саны елдан-ел азая бара. «Алар ел саен арабыздан китә. Һәм менә бу ветеран, кабинетлар, судларда йөреп арып беткәннән соң өенә кайта, аңа балалары, оныклары карый. Һәм сез бу балаларда, оныкларда Ватанны саклау теләге туа дип уйлыйсызмы? Юк», - дип белдерде «Россия офицерлары» вәкиле.
Липовой федераль законга башка локаль конфликтларда катнашучыларны ветераннар дип танырга мөмкинлек бирә торган төзәтмәләр кертергә тәкъдим итте. Аның фикеренчә, проблема Саклану министрлыгында документлар белән раслау кирәклегенә кайтып кала, ә бу күп очракта совет чорындагы исәпкә алу үзенчәлекләре аркасында кыенлаша.