Башкортстанда республика халыклары әкиятләре онлайн декадасы узачак
Фото: «Башинформ»
18-28 майда Башкортстанда халык авыз иҗатын саклауга һәм популярлаштыруга багышланган Башкортстан Республикасы халыклары әкиятләре онлайн декадасы узачак. Бу хакта «Башинформ» агентлыгы хәбәр итә.
Чарада теләге булган һәркем (аерым кешеләр дә, коллективлар да) катнаша ала. Түбәндәге форматлар рөхсәт ителә: театральләштерелгән яки курчак тамашасы - әкиятне сәхнәләштерү; әкиятне кычкырып уку; ирекле техникада әкият сюжетына мультипликация; эпик жанрда вокаль әсәрне башкару; композиторларның әкият тематикасына инструменталь әсәрләрен башкару; яраткан әсәрне (әкиятләр, былиналар, риваятьләр һ.б.) яттан уку; әкият сюжетына спектакль кую.
Онлайн декаданы Республика халык иҗаты үзәге оештыра.