Җәмгыять 4 февраль 2017 01:00

Узган ел Кайбыч районында 64 кеше яман шеш чире белән исәпкә куелган

38 кешедә авыру башлангыч стадиядә ачыкланган.

Скопировать ссылку

(Кайбыч, 4 февраль, "Татар-информ", «Кайбыч таңнары», Ләйсән Саттарова). Узган ел Кайбыч районында 64 кеше исәпкә алынды, шул исәптән, 38 кешедә авыру башлангыч стадиядә ачыкланды, дип яза район газетасы.

Диспансеризация ярдәмендә 10 кешедә шушы авыруны таптык. Чир иртәрәк ачыкланса, кешенең гомерен саклап калу ихтималы арта, -⁠ диде онколог. -⁠ Яман шешнең барлыкка килү сәбәпләре күптән билгеле инде. Беренче чиратта бу, әлбәттә, стресслар, тәмәке тарту, алкогольле эчемлекләрне кирәгенән артык куллану, физик активлык булмау, һаваның һәм экологиянең пычрануы, дөрес тукланмау, яшелчә һәм җиләк-⁠җимешне аз күләмдә ашау һәм башка сәбәпләр. Авыруның 30 проценты шуннан барлыкка килә. Икенче урында һөнәри авырулар тора. Зарарлы хезмәт шартлары – кайнар цехларда эшләү, зарарлы матдәләр куллану да яман шеш барлыкка килүгә сәбәпче булырга мөмкин. Аннары яман шеш тудырырга мөмкин авырулар бар. Гастрит, бөердәге ташлар киләчәктә онкологиягә китерергә мөмкин. Онкология белән нигездә элеккечә 60-⁠65 яшьтән узган кешеләр авырый дип уйлыйлар. 45-⁠50 яшьтән башлап даими рәвештә табибка күренеп торырга, кирәкле тикшеренүләрне вакытында узарга кирәк. Ир-⁠егетләргә елына бер тапкыр булса да ПСАга (простата-⁠специфический антиген) кан анализы бирергә киңәш ителә.

Хатын-⁠кызлар маммография узарга, аналык муенсасында рак булу-⁠булмауны ачыклау өчен цитология анализы тапшырырга, вакытында диспансеризация үтәргә тиеш. Һәркем елга бер тапкыр эчке органнарга УЗИ тикшеренүе, флюорография үтәргә тиеш. Диспансеризация яман шеш авыруын гына түгел, ракка сәбәпче булырга мөмкин авыруларны да ачыкларга ярдәм итә.

#Кайбыч #Кайбыч таңнары

Сәхифәләр

Узган ел Кайбыч районында 64 кеше яман шеш чире белән исәпкә куелган