Ушу остасы Ильяс Хөснетдинов спортчылар хорафатка ышана дип саный
“Спортчы һәр сынамышка ышана, хәтта аяк киеме бауларын да гел бертөрле бәйләргә тырыша”, - диде спортчы.
(Казан, 2 декабрь, “Татар-информ”, Динә Йосыпова). Ушу остасы, җиде тапкыр дөнья, алты тапкыр Европа һәм унтугыз тапкыр Россия чемпионы Ильяс Хөснетдинов спортчы һәр сынамышка ышана дип саный. Бу фикерен ул “Татар-информ” хәбәрчесенә биргән интервьюсында әйтте.
“Спортчы бит ул хорафатка ышанучы кеше. Ул һәр сынамышка ышана. Хәтта аяк киеме бауларын да ул гел бертөрле бәйләргә тырыша”, - диде ушу остасы.
Ильяс Хөснетдинов сынамышларга ышанмавын әйтте. “Ярышлар алдыннан мин сөйләшергә яратмыйм. Минем белән берәр кеше сөйләшә башлый икән, мин читкә китәргә, ул кеше белән сөйләшмәскә тырышам, чөнки ул минем ниндидер эчке әзерлекне боза. Туклану мәсьәләсенә килсәк тә, мин артык бер әйберне дә ашамаска тырышам. Бу хорафат та түгелдер инде, бу – минем принципларым”, - диде ул.
- Ильяс Хөснетдинов – халыкара класслы спорт мастеры, XXIX Бөтендөнья җәйге Универсиаданың көмеш призеры, ушу-таолу буенча 2018 елда узган дөнья Кубогы җиңүчесе, “Алтын билбау” – “Золотой пояс” сугышчан сәнгать өлкәсендә Татарстан Республикасының милли премиясе иясе, Татарстанның судьялар коллегиясе һәм Татарстан Республикасы буенча техник дәрәҗәләр комиссиясе рәисе.
- Ушу остасы белән тулы интервьюны “Интертат” сайтыннан укый аласыз.