Уральск Сабан туена Көнбатыш Казахстан өлкәсеннән кунаклар көтелә
Уральск Сабан туе быел 7 июльдә үткәрелә.
(Казан, 3 июль, "Татар-Информ", Айгөл Шәйхлисламова). Казахстанның Уральск шәһәре Сабан туена Көнбатыш Казахстан өлкәсеннән кунаклар киләчәк. Бу хакта “Татар-информ” хәбәрчесенә Уральск татарларының мәдәни үзәгенең яшьләр бүлеге җитәкчесе Лилия Кужаева хәбәр итте.
“Сабан туенда көрәш батырына һәрвакыттагыча тәкә бүләк ителәчәк. “Караш” группасы килә. Татарстаннан, Башкортстаннан кунаклар көтелә. Татарстанның һәм Башкортстанның атказанган артисты Рима Ключарева чыгыш ясаячак. Бәйрәм бөтен Көнбатыш Казахстан өлкәсе, Уральск шәһәрендә яшәүчеләр өчен оештырыла”, - диде Лилия Кужаева.
Сабан туенда балалар өчен дә күңел ачу чаралары үткәреләчәк. Аларга концерт, уеннар оештырылачак. Шулай ук, бүләкләр, тәм-томнар булачак.
- Казахстанның Уральск шәһәрендә 7 меңгә якын татар яши. Сабан туе ел саен үткәрелә, узган елны анда Татарстан Президенты да катнашкан.