«Урал – яшәү территориясе» экспедициясендә катнашучылар чәкчәк пешерде һәм калфак текте
Свердловск өлкәсенең 11 көллияте һәм техникумы студентлары «Урал – яшәү территориясе» өлкә туристлык-туган якны өйрәнү экспедициясендә катнашты. Бу хакта Бөтендөнья татар конгрессы матбугат хезмәте хәбәр итә.
4 июньнән 7 июньгә кадәр студентлар төбәкнең көньяк-көнбатыш өлешендә яшәүче татар, башкорт, мари халыкларының мәдәнияте белән танышты.
Экспедициядә катнашучылар Михайловск муниципаль берәмлеге һәм Красноуфимск муниципаль округы территориясендә булдылар, анда татар халкының гореф-гадәтләре белән якыннан таныштылар.
Әрәкәй авылында балалар үз куллары белән чәкчәк пешерде һәм милли хатын-кыз баш киеме – калфак текте. Аннары кунаклар Уфа-Шигере авылында мәчет бизәлешен карады, диелә хәбәрдә.