Хәвеф-хәтәр 11 февраль 2019 18:00

Унике җир участогы үзләштергән бакчачылык ширкәте рәисе хөкем ителәчәк

66 яшьлек ир-ат Старое Победилово бистәсендә җир биләмәләренә законсыз милекче итеп күрсәткән ялган белешмәләр ясаткан.

Скопировать ссылку

(Казан, 11 февраль, “Татар-информ”, Гөлнар Гарифуллина). Казанда Старое Победилово бистәсендә унике җир участогы үзләштергән “Залив” бакчачылык ширкәте рәисен хөкемгә тартачаклар. Бу хакта Татарстан прокурорының өлкән ярдәмчесе Руслан Галиев хәбәр итә.

Казанның Идел буе районы прокуратурасы аңа карата гаепләү бәяләмәсен раслаган. Бакчачылык оешмасы рәисе РФ Җинаять кодексының мошенниклык маддәсе буенча (159 нчы маддәнең 3 нче часте) җинаять кылуда гаепләнә.

Тикшерү версиясе буенча, 2009-2013 елларда “Залив” бакчачылык ширкәтенең 66 яшьлек рәисе, эш урыныннан файдаланып, ялган белешмәләр ясаткан. Алар буенча, Старое Победилово бистәсендә дистәдән артык җир биләмәсе аныкы һәм танышларыныкы булып исәпләнгән.

Чынлыкта исә участоклар гомуми кулланыштагы муниципаль җирләрдә һәм бакчачылык ширкәте чикләреннән тыш урнашкан. Шул рәвешле, муниципаль милектән законсыз рәвештә гомуми бәясе 2,2 млн сум булган 12 җир участогы законсыз үзләштерелгән.

Тикшерү барышында җир участокларына арест салынган. Эш Идел буе районы судына тапшырылган.

#җинаять

Сәхифәләр

Унике җир участогы үзләштергән бакчачылык ширкәте рәисе хөкем ителәчәк