Җәмгыять 24 июнь 2026 11:31

Уникаль осталык үзәге казанлыларны Яшьләр көнен яңа форматта билгеләп үтәргә чакыра

Скопировать ссылку

Уникаль осталык үзәге 27 июньдә 10:00 сәгатьтә Казан халкын һәм кунакларын Яшьләр көнен яңа форматта (иртәнге «кофе рейв») билгеләп үтәргә чакыра. Ул музыка, иҗат, аралашу һәм сәламәт яшәү рәвешен берләштерәчәк. Бу хакта Уникаль осталык үзәге матбугат хезмәте хәбәр итә.

Бүген дөньяның күп кенә шәһәрләрендә иртәнге очрашулар форматы популярлаша, анда кешеләр кич белән түгел, ә иртән — энергия туплау, фикердәшләр белән танышу һәм ял көннәрен рухландыргыч атмосферада башлау өчен җыела. Нәкъ менә шундый формат Уникаль осталык үзәгендәге бәйрәмнең нигезе булачак.

Чара программасында түбәндәгеләр каралган:

• «Махинарум» резидентларыннан диджей-сет;

• Мастер Аланнан йога-практика;

• кунаклар өчен кофе-станция;

• Татарстан яшьләре өчен заманча креатив индустрияләр, мәдәни инициативалар һәм мөмкинлекләр турында «Креатив.Татар» командасыннан ачык лекция;

• формаль булмаган аралашу, танышу һәм шәһәр берләшмәсе атмосферасы.

Чара мәдәният, иҗат һәм шәһәр мохитен үстерү белән кызыксынган яшьләрне каршы алу мәйданчыгы булачак.

«Безнең өчен Уникаль осталык үзәге тирәсендә яшьләр бергәлеген формалаштыру мөһим. Без яшь казанлыларда Татарстанның мәдәни кодына карата кызыксыну уятырга, традицияләрнең заманча һәм актуаль була алуын күрсәтергә телибез. Бүген Уникаль осталык үзәге - яңа идеяләргә, яшь авторларга һәм мәдәни тормышның заманча форматларына ачык киңлек. Нәкъ менә шуңа күрә дә без иртәнге «кофе рейв» форматын сайладык», - дип искәртте Уникаль осталык үзәгенең креатив кураторы Җәннәт Минһаҗева.

Оештыручылар билгеләп үткәнчә, бу чара һөнәрчелек, мәгариф, иҗат һәм заманча шәһәр инициативаларын берләштерүче ачык мәдәни платформа буларак Уникаль осталык үзәген үстерү программасының бер өлеше булачак.

Сәхифәләр

Уникаль осталык үзәге казанлыларны Яшьләр көнен яңа форматта билгеләп үтәргә чакыра