Ульяновскида татар теле һәм әдәбияты укытучыларының төбәкара семинары узды
Ульяновск шәһәренең 64 нче мәктәп базасында татар теле һәм әдәбияты укытучыларының төбәкара семинары узды. «Каләм белән җиңдек дошманны» исеме астында узучы семинар Бөек Җиңүнең 80 еллыгына багышланган. Бу хакта «Өмет» газетасының телеграм-каналы хәбәр итә.
Чарада Татарстанның Буа, Чүпрәле, Апас, Тәтеш районнарыннан, өлкә мәктәпләреннән илледән артык педагог катнашкан. Мәктәп фойесында күргәзмәләр, мастер-класслар оештырылган.
Төбәкара чараны өлкә мәгарифне үстерү институты баш белгече Әлфия Абутдинова ачып җибәрә һөм мөгаллимәләр Венера Шагвалиева белән Венера Мортазинага өлкә мәгърифәт һәм тәрбия министрлыгының Рәхмәт хатларын тапшыра.
Егерме сигездән артык милләт баласы белем алучы 64 нче мәктәп директоры Лилия Мустафина башкарылган эшләре, уңышлары турында мәгълүмат бирде. Өлкә татар милли мәдәни автономиясе рәисе Рамис Сафин ана теле сагында торучыларны сәламләде һәм дәресләргә күбрәк балаларны җәлеп итүдә бергәләп эшләргә кирәклегенә басым ясады.
Рәсми мәгълүматларга караганда, барлыгы 99 татар язучысы кулларына корал белән бергә каләм тотып сугыша. Семинарның икенче өлешендә ана теле укытучылары фронтовик язучыларның гомер һәм иҗат юлы турында ачык дәрес үткәрделәр, диелә хәбәрдә.