Ульяновскида татар иҗтимагый оешмалары җитәкчеләре җыелачак
Васил Шәйхразиев 28 февраль көнне Ульяновск шәһәренә эшлекле сәфәр белән барачак.
(Казан, 27 февраль, "Татар-информ"). Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразиев 28 февраль көнне Ульяновск шәһәренә эшлекле сәфәр белән барачак. Ул Идел буе федераль округы төбәкләрендә эшләп килүче татар иҗтимагый оешмалары җитәкчеләре белән очрашу уздырачак. Бу турыда Бөтендөнья татар конгрессы матбугат хезмәте хәбәр итте.
Сәфәр кысаларында Ульяновск өлкәсе губернаторы Сергей Иванович Морозов катнашыр дип көтелә.
Болардан тыш, Милли шура рәисе “Татарстан- яңа гасыр” ААҖнең Ульяновск филиалы, “Өмет” өлкә татар газетасы редакциясе, өлкә татар милли-мәдәният мохтиарияте, Ульяновск өлкәсе мөселманнарының төбәк Диния мөфтияте эшчәнлеге белән дә танышачак.