news_header_top
16+
news_header_bot
news_top

Ульяновск шәһәрендә татар язучылары белән очрашу үтте

10 ноябрьдә Ульяновск шәһәренең 17нче милли китапханәсендә күренекле татар язучысы, драматург, Татарстанның атказанган сәнгать эшлеклесе Рәдиф Сәгъди һәм язучы, журналист, Татарстан Язучылар берлеге әгъзасы Марат Закир белән очрашу кичәсе үтте. Бу хакта ТР Язучылар берлеге матбугат хезмәте хәбәр итә.

Әдәби кичәдә җирле шагыйрьләр, «Өмет» газетасы журналистлары, ана теле укытучылары, мәдәният хезмәткәрләре катнашты.

Чарада катнашучыларны өлкә татар милли мәдәни автономиясе рәисе урынбасары Рифкать Ахмедуллов, Татарстан Язучылар берлегенең Ульяновск бүлеге рәисе Шәфикъ Иматдинов, «Өмет» газетасының җаваплы сәркатибе Рузия Хәлимова сәламләде.

Казан кунаклары балаларга ана теленә, әдәбиятка, шигърияткә мәхәббәт тәрбияләү кирәклеген ассызыклап үттеләр һәм үзләренең иҗат җимешләре белән таныштырдылар.

«Нур» татар халык театры җитәкчесе Җәмилә Мифтахова Рәдиф Сәгъдигә «Сынган беләзек» әсәре кебек пьесалар иҗат итүен теләде, диелә хәбәрдә.

news_right_1
news_right_2
news_bot