Ульяновск өлкәсе Красный Гуляй бистәсе мәчетендә район ифтары булды
Өлкә мөфтие, төбәк диния нәзарәте рәисе Илдар хаҗи Сафиуллин мөселман кардәшләребезне бердәмлеккә һәм мәчет-мәдрәсәләргә йөрүчеләр санын арттырырга, яшьләрне намаз юлына тартырга өндәде.
(Казан, 29 апрель, «Татар-информ»). Шушы көннәрдә Ульновск өлкәсенең Красный Гуляй бистәсе мәчетендә район ифтары узды. Ифтар мәҗлесен бистәдә яшәүче эшмәкәр Азиз Камалов үткәрде.
Мәҗлескә хөрмәтле кунаклар — Сенгилей район хакимияте башлыгы Михаил Самаркин, район администрациясе башлыгының беренче урынбасары Рамис Саржанов, өлкә мөфтие Илдар хаҗи Сафиуллин һәм күрше Силикатный бистәсеннән вәкилләр килгән иде. БУ турыда «Өмет» газетасы хәбәр итә.
Мәҗлесне Рафаэль Мумязин «Ясин» сүрәсен уку белән башлап җибәрде. Аннары имам-хатыйб Рамис хәзрәт тирән эчтәлекле вәгазь сөйләде. Өлкә мөфтие, төбәк диния нәзарәте рәисе Илдар хаҗи Сафиуллин мөселман кардәшләребезне бердәмлеккә һәм мәчет-мәдрәсәләргә йөрүчеләр санын арттырырга, яшьләрне намаз юлына тартырга өндәде.
«Аллаһы Тәгалә һәркайсыбызның тоткан уразаларын, укыган тәравихларын кабул итсен, саулык-сәламәтлек белән гает намазында очрашырга насыйп булсын!» — диде мөфти.