Фән һәм мәгариф 1 октябрь 2014 17:38

Укытучылар көнендә Казанда ике белем бирү үзәге ачылачак

Аларның берсе - Милли мәгариф үзәге, икенчесе - Республика олимпиада үзәге

Скопировать ссылку

(Казан, 1 октябрь, “Татар-информ”). 6 октябрь – Укытучылар көнендә Казанда Татарстанда беренче Милли мәгариф үзәге һәм Республика олимпиада үзәге ачылачак.

Милли мәгариф үзәгенә “Балакай” балалар бакчасы, Казан федераль университеты каршындагы 2нче гимназия һәм 32нче музыка мәктәбе керә. Үзәкнең төп үзенчәлеге – халкыбызның тарихы, гореф-гадәтләре, мәдәнияте нигезендә туган телдә белем алу барышының өзлексезлеген гамәлгә ашыру.

Белем бирү оешмасы ТР Фән һәм мәгариф министрлыгы, Бөтендөнья татар конгрессы Башкарма комитеты, Казан федераль университетының туган телдә белем бирүне оештыру буенча эш тәҗрибәсен саклау, гомумиләштерү һәм тарату буенча ресурс үзәге булып торачак.

Шул ук көнне тагын бер мәгариф үзәге – ТР Фән һәм мәгариф министрлыгы карамагындагы беренче республика олимпиада үзәген ачу планлаштырыла. Республика олимпиада үзәге эшчәнлегенең төп юнәлешләре – сәләтле балалар һәм талантлы педагоглар белән эшләү.

ТР Мәгариф һәм фән министрлыгының матбугат хезмәте хәбәр иткәнчә, учреждениедә каникуляр интенсивлар, профильле сменалар һәм интеллектуаль-иҗади чаралар вакытында Татарстанның сәләтле мәктәп укучыларының укуы һәм яшәве өчен барлык уңайлыклар булдырылган.

Сәхифәләр

Укытучылар көнендә Казанда ике белем бирү үзәге ачылачак