Уфада татар халкының йола бәйрәме - «Каз өмәсе» узды
Скопировать ссылку
19 декабрьдә Уфаның Гази Заһитов исемендәге 65нче татар гимназиясендә татар халкының борынгы йола бәйрәме - «Каз өмәсе» узды. Бу хакта Бөтендөнья татар конгрессының матбугат хезмәте хәбәр итә.
Татар авылларында яшәүчеләр көз көне, казларны суеп, бергәләп аларның йонын йолкый, түшкәләрен чишмәгә алып барып юа. Каз мамыгы тутырылган мендәрләрне, бирнә өчен, кәләшләргә тапшыралар.
Бәйрәмдә үзара аралашалар, җырлар җырлыйлар. «Каз өмәсе» халыкның бердәм булуын күрсәтә һәм кешеләрне берләштерә.
Бәйрәм күңелле биюләр, җырлар һәм кызыклы бәйгеләр белән истә калды. Чарада чакырылган кунаклар: татар конгрессы вәкилләре дә катнашты, диелә хәбәрдә.