Мәдәният 10 февраль 2024 13:20

Уфада Рудольф Нуриев исемендәге Халыкара балет сәнгате фестивале була

Скопировать ссылку

17-23 март көннәрендә Уфада Рудольф Нуриев исемендәге XXIV Халыкара балет сәнгате фестивале узачак. Бу хакта «Башинформ» яза.

Фестиваль кысаларында Лев Степанов һәм Заһир Исмәгыйлевнең «Торна җыры», Людвиг Минкусның «Дон Кихот», Херман Левенскольдның «Сильфида», Петр Чайковскийның «Аккош күле» балетлары күрсәтеләчәк. Шулай ук балет сәхнәсе дөнья йолдызлары катнашында ике гала-концерт планлаштырылган. Рудольф Нуриев исемендәге балет сәнгате фестиваленең концерт-ачылышы — «Аның исеме Рудольф Нуриев», концерт-ябылышы «Балет легендасы» исеме астында узачак.

Фестивальдә Россиянең Зур театры, Мариин театры, Борис Эйфман балет театры, «Кремль балеты» театры, Станиславский һәм Немирович-Данченко исемендәге академик музыкаль театр, «La classique» Мәскәү классик хореография балет театры, «Урал Опера Балет» Екатеринбург дәүләт театры, шулай ук «Астана опера» балет һәм опера театры солистлары чыгыш ясаячак.

Нуриев фестивале — Уфада 1993 елдан бирле күренекле балетмейстер Юрий Григорович инициативасы белән үткәрелә торган абруйлы балет форумнарының берсе.

Сәхифәләр

Уфада Рудольф Нуриев исемендәге Халыкара балет сәнгате фестивале була