Уфада мәктәп ашханәләрен Казан үрнәгендә рестораннарга үзгәртәчәкләр
Татарстан башкаласындагы 28 мәктәптә укучылар «швед өстәле» системасы буенча туклана.
(Казан, 9 июль, «Татар-информ», Динара Прокопьева). Уфада мәктәп ашханәләрен Казан үрнәгендә рестораннарга үзгәртәчәкләр. Татарстанның Башкортстандагы даими вәкиле Ранэль Зиннәтуллин «Татар-информ» агентлыгына биргән интервьюсында шул хакта хәбәр итте.
«Мәктәпләрдә рестораннар ачу - Татарстанда гамәлгә ашырыла торган белем бирү проекты. Казан шәһәрендәге белем бирү учреждениеләрендә алар ачылды инде. «Мәктәп рестораннары» проектын Уфада да гамәлгә ашыру күздә тотыла», - диде ул.
«Мәктәп рестораны» проекты кысаларында укучылар «швед өстәле» системасы буенча туклана. Укучылар өч төрдәге беренче, икенче ашларның, салат һәм эчемлекләрнең үзләре теләгәнен сайлап алалар. Ашханәләрдә капиталь ремонт үткәрелгән, уңайлы заманча интерьер булдырылган һәм ризыклар тарату линиясе оештырылган.
- «Мәктәп рестораны» проекты Казанда 2013 елдан бирле гамәлгә ашырыла. Бүген Татарстан башкаласында 28 мәктәп рестораны бар.