Мәдәният 2 октябрь 2023 14:55

Удмуртиядә «Мирас» татар мәдәнияте фестиваль-бәйгесе була

Скопировать ссылку

Удмуртиядә IX-XI сыйныф укучылары, урта һөнәри уку йортлары студентлары һәм эшләүче яшьләр арасында «Мирас» татар мәдәнияте фестиваль-бәйгесе игълан ителде. Бу хакта Можга татарлары автономиясенең «ВКонтакте» социаль челтәрендәге төркемендә хәбәр ителә.

Чара «Татар халкының мәдәни мирасын саклыйбыз» дигән шигарь белән «Яшьләр елы»на багышлап үткәрелә. Конкурс 21 октябрьдә 14.00 сәгатьтә Можга шәһәренең «Октябрь»-ЦНК» мәдәният йортында (Чапаев тыкрыгы, 8) узачак.

Фестиваль-бәйгенең төп максаты яшьләрдә татар халкының әдәби, мәдәни-тарихи, музыкаль, башкару, сәнгать һәм театраль мирасына карата кызыксыну уяту; татар халкының мәдәни үзенчәлеген һәм традицияләрен саклауда ярдәм күрсәтү, күпмилләтле җәмгыятьтә тынычлык һәм татулыкны пропагандалау; талантлы башкаручыларны ачыклаудан һ.б. гыйбарәт.

Фестиваль-бәйгенең конкурс программасында Можга шәһәренең IX-XI сыйныф укучылары, урта һөнәри уку йортлары студентлары һәм эшләүче яшьләр (15-35 яшьтәгеләр) катнаша ала. Катнашу өчен 19 октябрьгә кадәр оештыру комитетына dkok8@yandex.ru электрон адресы буенча заявка җибәрергә кирәк. Башкарыла торган әсәрләрнең минус вариантын заявка белән бергә җибәрү сорала, диелә хәбәрдә.

#Удмуртия татарлары

Сәхифәләр

Удмуртиядә «Мирас» татар мәдәнияте фестиваль-бәйгесе була