Удмуртия дәүләтчелегенең 100 еллыгы бәйрәмендә татар милли сәхнәсе дә оештырылачак
Удмурт халкының «Выль» — яңа уңыш бәйрәме көнендә төрле милләт халыклары үз мәдәнияте белән таныштырачак.
(Казан, 9 июнь, «Татар-информ»). 22 августта Удмуртиянең Вавож районында Удмуртия дәүләтчелегенең 100 еллыгы уңаеннан барлык милләтләрне берләштерүче дуслык бәйрәме була. Биредә татар милли сәхнәсе аерымы оештырылачак. Бу турыда Удмуртия татарларының «Яңарыш» сайты хәбәр итте.
Бу удмурт халкының «Выль» — яңа уңыш бәйрәме көненә туры килә. Кунакларга удмурт халкының рухи байлыгы күрсәтеләчәк, үткәне, бүгенгесе белән танышу мөмкинлеге булачак.
«Тарихта беренче тапкыр удмурт милли бәйрәмендә республиканың башка халыклары үз иҗатларын күрсәтәчәкләр. Бу көнне мәйданда безнең — татарларның — үз сәхнәбез булачак. Анда без башка милләтләрне җыр-биюләребез, милли уеннарыбыз белән таныштыра алачакбыз», — ди Удмуртия татарларының милли-мәдәни автономиясе рәисе Рәмзия Габбасова:.
Республиканың барлык район-шәһәрләреннән делегацияләр чакырылак. Шулай ук Татарстан Республикасыннан кунаклар, танылган сәхнә осталары килер дип көтелә, диелә хәбәрдә.