Уңышка ирешкән яшьләр Казанда "Оpen Fest" татар җырлары фестивалендә катнаша
"Казан Кремле" музей-тыюлыгына килүче туристлар "Молодые и успешные" тамашасын карый алачак.
(Казан, 28 июнь, “Татар-информ”, Ләйлә Хәкимова). Казанда "Оpen Fest" яшьләр җыр фестивале башлана. "Казан Кремле" Дәүләт тарих-архитектура һәм сәнгать музей-тыюлыгына килүче туристлар "Молодые и успешные" тамашасын карый алачак. Бу хакта IT-паркта – чемпионатның шәһәр матбугат үзәгендә музейның директоры Зилә Вәлиева хәбәр итте.
"Туристларны татар җырлары белән таныштыру максатыннан оештырабыз әлеге фестивальне. Татар халкының матур, моңлы, аһәңле җырларын яшь буын вәкилләре башкарачак. Шуңа күрә концертның исеме "Молодые и успешные" дип атала. Җырчылар арасында Алинә Шәрипҗанова, Эльмир Низамов кебек талантлы яшьләребез булачак. Тамашаны көннең беренче яртысында уздырырга планлаштырдык, туристлар өчен бик яхшы күңел ачу чарасы дип саныйм", - дип әйтте үзенең чыгышында Зилә Вәлиева.
Фестиваль 30 июньдә башланыр дип көтелә.
