Тулы вәкаләтле вәкиллектә Татарстанның Сингапур белән хезмәттәшлеге хакында сөйләштеләр
ТР вице-премьеры – Татарстанның Россиядәге тулы вәкаләтле вәкиле Равил Әхмәтшин Сингапур Республикасының Гадәттән тыш һәм Тулы вәкаләтле Илчесе Нео Эк Бенг Марк белән очрашты.
Чарада шулай ук Илченең урынбасары Ли Жи Уэй Николас һәм Татарстанның Россиядәге тулы вәкаләтле вәкиле урынбасары Фәннур Гарифуллин катнашты, дип хәбәр итә Тулы вәкаләтле вәкиллекнең матбугат хезмәте.
Кунакларга Татарстанның икътисади һәм инвестицион потенциалын тәкъдим иттеләр. Яклар кайбер юнәлешләр, шул исәптән югары технологияле өлкәләрдәге хезмәттәшлек вариантлары хакында фикер алышты.
Илче Сингапур җитәкчелегенең, Иннополис шәһәре белән уртак проектларны гамәлгә ашыруны да кертеп, Татарстан белән тыгыз элемтәләрне яңадан башлауга карата кызыксыну белдерүен билгеләп үтте.
Нео Эк Бенг Марк 2025 елда Сингапурның эшлекле даирә вәкилләре белән бергә республикага килергә теләвен белдерде.
Татарстанның Россиядәге Тулы вәкаләтле вәкиллеге фотолары