Авыл 27 сентябрь 2017 06:00

Тукай районы игенчеләре 152 мең тонна ашлык җыйды

Республикада бөртеклеләр бүгенгә 5 млн тоннадан артык җыелган.

Скопировать ссылку

(Тукай районы, 27 сентябрь, "Татар-информ", "Якты юл"). Тукай районы игенчеләре 152 мең тонна ашлык җыйды, дип яза җирле басма.

Республикада бөртеклеләр бүгенгә 5 млн тоннадан артык җыелган. Бөртеккә алынасы кукурузны да кертеп, бу күрсәткечне 5,2 млн тоннага җиткерү күздә тотыла, дип белдерде журналистлар өчен үткәрелгән видеобрифингта ТР авыл хуҗалыгы һәм азык төлек министры Марат Әхмәтов. Узган ел исә Татарстан буенча 4,3 млн тонна ашлык җыелган булган. Ләкин бөртекнең базар бәясе үзкыйммәте белән бер дәрәҗәдә, әле алай да сату кыен, диде министр. Бу уңыш яхшы булган елның үзенчәлеге. Шулай да борчылырга кирәк түгел, һәр ел бертөрле килми, бөртекне запаста тоту турында уйлау мөһим, дип белдерде Марат Әхмәтов.

Бәрәңгегә быел ихтыяҗ булырга тиеш, дип фаразлады ул. Чөнки бу культура быел ваграк чыга.

Шикәр чөгендере мәйданнарының бүгенгә 40 проценты алынган. Татлы тамыразыктан республика буенча 3 млн тонна уңыш көтәләр.

Район күрсәткечләренә килгәндә, урып-җыю, нигездә, төгәлләнде, дип белдерде авыл хуҗалыгы һәм азык-төлек идарәсе башлыгы Хәйдәр Сабитов. 43 мең гектардан артык мәйданнан 152 мең тоннадан артык ашлык җыелды. Әйтергә кирәк, бу соңгы 5-6 елда рекордлы күрсәткеч. Гектардан 36 центнер икмәк чыккан. Урак соңга калса да, уңыш яхшы. «2018 ел уңышы өчен чәчүлек орлык тулысынча әзерләп куелды, бүгенгә барлыгы 10354 тонна бөртек салынды. Шулай ук безнең хуҗалыклар күрше-тирә районнарны орлык белән тәэмин итә», – дип белдерә Россельхозцентрның районара филиалы җитәкчесе Назим Сәләхетдинов.

Хәзерге вакытта рапс уру дәвам итә, әлегә 2 мең гектарның яртысы алынган. Шикәр чөгендеренең бездә 60 проценты казылган, барлыгы 80 мең тонна уңыш җыелган. бәрәңге, яшелчәләр җыю дәвам итә, аграрийлар силоска кукуруз җыярга керештеләр, көзге чәчү тәмамланды, туңга сөрүнең 65 проценты башкарылган.

#Тукай #Якты юл

Сәхифәләр

Тукай районы игенчеләре 152 мең тонна ашлык җыйды