«Туган телем» V Халыкара шигырь сөйләүчеләр конкурсының җиңүчеләре билгеле – исемлек

Бүген Казан кооператив институтының Дәрдемәнд исемендәге Татар мәдәнияте үзәгендә «Туган телем» V Халыкара шигырь сөйләүчеләр конкурсына йомгак ясалды. Ул ХХ гасыр башының татар шагыйре, сәүдәгәр, меценат, алтын приисклары хуҗасы булган Закир Рәмиев (Дәрдемәнд) истәлегенә оештырылды. Быел Дәрдемәнд тууына 165 ел.

«Кичә Дәрдемәндкә багышланган фильмнарны карау белән башланып китте. Соңыннан Казанның 175 гимназия укучылары Дәрдемәнднең «Кораб» шигырен сәхнәләштерде. Быел конкурска 200гә якын видео килде. 400дән артык кеше катнашты», - диде «Татар-информ» хәбәрчесенә институтның Дәрдемәнд исемендәге Татар мәдәнияте үзәге җитәкчесе Флюра Абдуллина.

Аның әйтүенчә, Үзбәкстан, Башкортстан, Туймазы шәһәре, Түбән Новгород өлкәсе Зур Рбишча мәктәбе, Татарстанның Мамадыш, Әтнә, Арча, Балтач, Әлки, Лаеш, Балык Бистәсе, Ютазы, Саба, Сарман, Азнакай, Әгерҗе, Чүпрәле, Теләче, Кукмара, Аксубай, Чистай, Түбән Кама район мәктәпләре, Чаллы, Казан гимназияләре, балалар бакчалары, вузларда белем алучы студентлар, китапханәчеләр, укытучылар, татар оешмалары вәкилләре Дәрдемәнд шигырьләрен сөйләгән.

Татарстан Язучылар Берлеге рәисе,Татарстанның халык шагыйре Ркаил Зәйдулла конкурста катнашучыларны сәламләгән, Дәрдемәнд эшчәнлеген өйрәнеп, китаплар нәшер иткән Габдулла Тукай бүләге лауреаты, язучы Лирон Хәмидуллин Дәрдемәнд тормышы һәм иҗаты белән таныштырган. Бөтендөнья татар конгрессы Башкарма комитеты рәисе урынбасары Рәзил Зиннәтуллин кичәнең әһәмиятле булуына басым ясаган.

«Филология фәннәре докторы, профессор, академик, халыкара конкурслар лауреаты Болгария Халыкара фәнни үзәк директоры Альбина Вәлиева үзенең мандолинасында татар халык көйләрен уйнады. Онлайн элемтәдә Төркиянен Малатия шәһәрендәге Иненю университетының Фән-әдәбият факультетында Төрек теле һәм әдәбияты бүлемендә эшләүче профессор Рамилә Яруллина-Йылдырым онлайн элемтәгә кереп, Дәрдемәнднең Төркиядә яшәгән чорын искә төшерде. Төрек кызы Нәслихан Яшар Дәрдемәнднең шигырен көйләп укыды», - диде Флюра Абдуллина.

Шагыйрьнең туган ягыннан килгән «Башкортстан Татар Конгрессы»ның Мәләүз җирле бүлеге рәисе Лилия Камалова Җиргән авылы халкыннан сәламен әйтеп, Дәрдемәнд истәлегенә уздырылган һәм оештырылачак чаралар турында сөйләгән. Ул Дәрдемәндкә багышлап шигырь язучыларга бүләкләр, Рәхмәт хатлары алып килгән.

Әлки районы, Яңа Салман урта гомуми белем бирү мәктәбе укытучысы Гүзәлия Рәхмәтуллина, Казанның 16 татар-инглиз гимназиясенең 6 сыйныф укучысы Ислам Сафиуллин, Казанның 16 татар-инглиз гимназиясенең 8 класс укучысы Хәнифә Халикова, «Казан төзелеш, архитектура һәм шәһәр хуҗалыгы көллияте»студенты Раян Шакиров Дәрдемәндкә багышлап шигырь язган.

Эшләрне шагыйрь, әдәбият галиме Равил Рахмани бәяләгән. Татарстанның атказанган сәнгать эшлеклесе Филүсә Арсланова, Россия мөселманнары Диния нәзарәтенең матбугат үзәге хезмәткәре Ләйсирә Фазлыева конкурска килгән эшләрне карап, урыннар билгеләгән.

• Беренче урынга лаек булган, Чаллы шәһәренең Мулланур Вахитов исемендәге 2 гимназиясенең 6 сыйныф укучысы Луиза Гафиятова, Саба районы Тимершык урта гомуми белем бирү мәктәбенең 6 класс укучысы Илназ Биктимеров, Казанның 171 нче мәктәбенең 3 сыйныф укучысы, «Мирас» футбол командасы капитаны Заринә Газизуллина, Казан политехника көллияте студенты Алсын Каримов Дәрдемәнд шигырен сөйләгән. Казанның 180 нче күп профильле полилингваль гимназиясенең 10 класс укучысы Язилә Мозаффаровага беренче дәрәҗәдәге диплом белән бергә «Безнең кавем» китабы да тапшырылган.

«Дәрдемәнднең «Бәллү» шигыренә композитор, шагыйрә, Татарстанның атказанган сәнгать эшлеклесе Наилә Яхина көй язган. Ул аны бүгенге тантанада башкарып та күрсәтте. Скрипкада Татарстанның атказанган артисты Марат Әюпов уйнады. Казан кооператив институты профессоры Алсу Вәлиева Дәрдемәнднең «Кораб» шигырен инглиз теленә тәрҗемә иткән. Аны институт студентлары татарча, русча, инглизчә яңгыратты», - диде Татар мәдәнияте үзәге җитәкчесе.

Төркия һәм Юнесконың алтын медаль иясе, Бөтендөнья халыкара конкурслар лауреаты, Гран-при иясе, җырчы, актриса Гөлнара Хәйруллина Дәрдемәнднең шигырен сөйләгән һәм Габдулла Тукайның «Туган тел» җырын башкарган. Дипломга ия булучыларга Дәрдемәнд һәм башка шәхесләр фотосы кергән блокнотлар, календарьләр бүләк ителгән. Аларны Казан кооператив институтының Дәрдемәнд исемендәге Татар мәдәнияте үзәге махсус нәшер иткән.

• Конкурс Казан кооператив институтының Дәрдемәнд исемендәге Татар мәдәнияте үзәге, Татарстан Дәүләт Советының» Мәрхәмәт-Милосердие» хатын-кыз депутатлары берләшмәсе, Дөнья мәдәнияте институты (Юнеско), Казан шәһәре мәгариф идарәсе, Татарстан Язучылар берлеге, Бөтендөнья Татар конгрессы Башкарма комитеты, Әлки районы «Якташлык» җәмгыяте белән берлектә оештырылган. Быел Казан кооператив институтының Дәрдемәнд исемендәге Татар мәдәнияте үзәгенә биш ел. 2022 елдан башлап үзәк Дәрдемәнд исемен йөртә.