Тубылдагы “Сүзге патшабикә” рәсем конкурсы өлкә күләмендә уза башлый
Төмән өлкәсе Тубыл шәһәрендә оештырыла торган «Легендар Сузге патшабикә» районара рәсем конкурсы киләсе елда өлкә күләмендә үтәчәк. Бу турыда «Себер татар дөньясы» яза.
Себер ханлыгының Сүзге патшабикәсе образын популярлаштыруга юнәлдерелгән конкурс быел өченче тапкыр үткән. Бәйгене Тубыл шәһәре Себер татарларының милли-мәдәни автономиясе уздыра.
Фото: «Себер татар дөньясы»
Бәйгедә катнашучыларның яшенә карый берничә номинация билгеләнгән. Анда 5-7 яшлек сабыйлар да, 8-14 яшьтәге мәктәп укучылары, 18 яшьтән һәм аннан өлкәнрәкләр дә катнаша. Быел бәйгегә барлыгы 160 эш килгән.
Автономия җитәкчесе Зәйтүнә Тычинских билгеләп үткәнчә, быел балалар бакчаларыннан конкурста катнашырга теләк белдерүчеләр саны арткан. Чара кысаларында себер татарлары активы Сүзге тарихына бәйле докладлар белән чыгыш ясаган. Балалар Петр Ершовның «Сузге» поэмасы белән дә якынрак танышкан.
Тиздән Сузгегә багышланган иҗади эшләрнең күргәзмәсе тәкъдим ителәчәк. Кураторы - конкурсның жюри рәисе, рәссам Асия Закарюкина.
Оештыручылар «Бәрәкәт» хәйрия фонды рәисе Ринат Насыйровка проектка күрсәткән финанс ярдәме өчен рәхмәтен белдерә.
Сүзге-бикә, яки Сүзге Ханым – себер ханы Күчемнең хатыны. Күчем хан хатынына аерым шәһәрчек төзеп бирә. Сүзге ханбикә акыллы, матур, зирәк булуы белән таныла. Күчем хан һәр җомга хатыны янына килеп ял иткән, аңа кыйммәтле бүләкләр китергән. Себерне Ермак яулап алгач, Сүзге ханбикә үз-үзенә кул салган, диелә риваятьләрдә.