Тубылдагы өлкә Сабан туе 20 меңнән артык кунакны җыйды
Тубыл шәһәрендә өлкә Сабан туе узды. Анда 20 меңнән артык кунак җыелды. Бу хакта «Яңарыш» газетасының телеграм-каналы хәбәр итә.
Халык бәйрәме Базар мәйданында узды. Төбәк муниципалитетлары тәкъдим иткән ун татар хуҗалыгы, шулай ук фольклор ансамбльләре чыгышлары һәм спорт ярышлары бик күп тамашачыларны җәлеп итте. «Россиягә хезмәт итәм» хәрби-патриотик күргәзмәсе аеруча кызыксыну уятты.
Сабан туе – 2025 төбәктәге Геройлар елына һәм Бөек Ватан сугышында Җиңүнең 80 еллыгына багышланган иде.
Кунаклар себер татарларының традицион ризыгы – бавырсак әзерләү буенча мастер-класста катнашты.
Концерт программасына төбәкнең төрле мәдәниятләрен – татарлар, руслар, белоруслар, үзбәкләр, себер якларында яшәүче халыкларны тәкъдим иткән 60 тан артык артист чыгышы кертелгән иде, диелә хәбәрдә.