Түбән Кама кешеләре 20 тонна гуманитар ярдәм һәм 2 миллион сумнан артык акча җыйган
Түбән Камадан гуманитар йөкнең зур партиясен җибәрделәр. Россия Дәүләт Думасы депутаты Айдар Метшин сөйләгәнчә, бу юлы йөк үзенчәлекле. Ул Украина Кораллы көчләре һөҗүменнән соң җимерелгән медицина ярдәме күрсәтү пунктын торгызу өчен билгеләнгән. Бу хакта http://nkamsk-rt.ru/ сайтында Фәридә Зарипова яза.
«Хәрбиләр медицина ярдәменнән мәхрүм калды. Ярдәм җыюга күпләр кушылды һәм моны бик оператив эшләделәр. Уртак тырышлык белән 2 миллион сумнан артык акча җыя алдык! Бу эшкә кушылган һәркемгә рәхмәт белдерәм!» — дип язган Айдар Метшин.
Депутат шулай ук 20 тонна йөктә караватлар, урын-җир, носилкалар, төзелеш материаллары һәм медикаментлар туплануын билгеләп үтте.
«Болар барысы да 430нчы полк хәрбиләре ярдәм алган госпитальне тиз арада торгызу өчен кирәк. Бу полкта Түбән Камадан киткән 200дән артык егет хезмәт итә. Йөкне Донбасс волонтерлары һәм Түбән Кама районының «Хәрби туганлык» белән берлектә озаттык», — дип сөйләде Айдар Метшин.