Түбән Сосна авылында «Сосна чабатасы» фильмын тәкъдим иттеләр
Балтач районы Түбән Сосна авылы мәдәният йортында «Сосна чабатасы» фильмын авыл халкына күрсәткәннәр. Фильм чабата биюенә багышланган. «Сосна чабатасы» фильмы Татарстан Республикасы Мәдәният министрлыгы субсидиясе ярдәмендә төшерелгән. Режиссеры – Рәдиф Кашапов.
«70тән артык кеше җыелды, тарихи вакыйга дип исәпләделәр. Алсу Мәгъсүмҗанова үзе дә биеде, аннары, ике баянчы белән, кешене дә биетте-уйнатты», – диде «Татар-информ»га музыкант, журналист Рәдиф Кашапов.
«Чабата биюенең үзенчәлеге ритмында: дүрттән ике түгел, ә дүрттән өч. «Сосна чабатасы» фильмын төшергән төркем әлеге бию аеруча популяр булган авылларның берсе – Балтач районындагы Түбән Сосна авылына барды. Сүз уңаеннан, элек чабатаны ир-атлар гына биегән», – дигән иде оештыручылар.
- Проектның иҗат төркеме: режиссер - Рәдиф Кашапов, куючы оператор һәм монтаж ясаучы — Илнар Фатихов, оператор — Ильяс Гафаров, тавыш режиссеры һәм музыкант — Тимур Милюков, музыкант — Айдар Әбдрәхимов, хореограф һәм перформер — Алсу Мәгъсүмҗанова.