ТР Премьер-министры урынбасары, Бөтендөнья татар конгрессының Милли Шура рәисе Васил Шәйхразыев эш сәфәре белән Түбән Новгород өлкәсенә килде. Бу хакта Бөтендөнья татар конгрессының матбугат хезмәте хәбәр итә.
Бүген ул Түбән Новгород Ярминкә мәчете төзеләчәк урын белән танышты.
Россиянең иң зур икътисади, административ һәм мультимәдәни үзәкләреннән берсе буларак Түбән Новгородның тышкы күренеше 1820 елдан 1920 елга кадәр бер гасыр дәвамында формалашкан. Нәкъ менә шушы вакытта Түбән Новгород Ярминкә мәчете эшләгән, ул Россия һәм чит ил мөселманнарының аралашу үзәге булган. 1917 елгы революциядән соң объект советлар тарафыннан җимерелгән. Хәзер төбәк Хөкүмәте һәм Россия мөселманнары Диния нәзарәте бинаның проектын әзерләргә кереште.
Түбән Новгородта борынгы Ярминкә мәчетен яңадан торгызу күздә тотыла. Дини объект Ока елгасы буенда калкып чыгачак.