Түбән Новгородта «Бигиев укулары» XI төбәкара конференциясе узды
Түбән Новгородның «Тәүбә» Җәмигъ мәчете комплексында Муса Бигиев – күренекле татар фәлсәфәчесе, дин белгече, җәмәгать эшлеклесе һәм публицист Муса Бигиев исемендәге «Бигиев укулары» XI төбәкара конференциясе узган. Быел конференция «Россиянең фәнни-мәгариф киңлегендә ислам дин белеме» темасына багышланган. Бу хакта Түбән Новгород мөселманнары Диния нәзарәте хәбәр итә.
Конференция программасында күптөрле мәсьәләләр каралган. Төп игътибар Россиянең югары белем бирү системасында ислам белеменең урыны һәм роленә, шулай ук бу өлкәдәге фәнни-тикшеренү эшләренең актуаль юнәлешләренә һәм дин белемен фәнни тикшеренүләргә интеграцияләүгә бирелгән. Шулай ук ислам мәгариф оешмалары өчен фәнни-педагогик кадрлар әзерләү темасы һәм мөселман галимнәренең фәнни мирасы аерым каралган. Моннан тыш, конференциядә катнашучылар дини һәм дөньяви белем бирү оешмаларының үзара хезмәттәшлеге, дин белеменең гомумроссия гражданлык үзаңын ныгытудагы роленә дә тукталган.
Конференция эшендә мәгариф һәм дини оешмалар вәкилләре, фәнни-педагогик хезмәткәрләр, дин белеме өлкәсендә тикшеренүләр белән шөгыльләнүче экспертлар, мәгариф идарәсе органнары вәкилләре, шулай ук дини белем бирү мәсьәләләре белән шөгыльләнүче аспирантлар һәм тикшеренүчеләр катнашкан.
Чараны Россия Федерациясе мөселманнары Диния нәзарәте, Мәскәү ислам институты, Ислам мәдәниятен, фәнен һәм мәгарифен яклау фонды ярдәме белән «Сафмар» хәйрия фонды һәм «Мәдинә» нәшрият йорты оештырган.