Түбән Новгород өлкәсендә язучы Кави Нәҗмигә һәйкәл ачылды
Түбән Новгород өлкәсенең Кызыл Октябрь районы Уразовка авылында татар әдәбияты классигы Кави Нәҗмигә һәйкәл ачу тантанасы узды. Чарада Түбән Новгород өлкәсе губернаторы Глеб Никитин, Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев, хакимият органнары вәкилләре, мәдәният һәм фән эшлеклеләре, Татарстан делегациясе, Бөтендөнья татар конгрессы хезмәткәрләре, язучының туганнары катнашты.
Бөтендөнья татар конгрессы матбугат хезмәте хәбәр итүенчә, һәйкәл үзәк скверда урнашкан. Ул җырчы Рәшит Ваһапов һәм опера башкаручысы Хәйдәр Бигичев һәйкәлләре янына урнаштырылды. Шулай итеп, хәзер паркта төбәктән чыккан татар милли эшлеклеләрнең хәтер аллеясы формалаша башлады.
Һәйкәл кую проектын Рәшит Ваһапов исемендәге Татар мәдәнияте иҗтимагый фонды җитәкчесе Рифат Фәттахов һәм Түбән Новгород татарларының Казандагы «Якташлар» җәмгыяте башлап җибәрде. Бюст Татарстан Республикасы Рәисе Рөстәм Миңнеханов карары белән республика бюджеты хисабына эшләнде.
Һәйкәлнең скульпторы – Тимофей Тюрин. Проект архитекторы – Герман Бакулин. Ул Рәшит Ваһапов һәм Хәйдәр Бигичев һәйкәлләре проектларын иҗат иткән кеше. Бу скверның бердәм архитектура ансамблен сакларга мөмкинлек бирде.
Кави Нәҗми (1901–1957) Түбән Новгород өлкәсенең Кызыл Остров авылында туган. Ул заманча татар прозасы һәм шигъриятенә нигез салучыларның берсе буларак тарихка кереп калган, Татарстан АССР Язучылар берлегенең беренче рәисе булган. «Язгы җилләр» романы өчен язучы Сталин премиясенә лаек булган.
Язучының тууына 125 ел тулу уңаеннан, 2026 ел Нижегородск өлкәсендә Кави Нәҗми елы дип игълан ителде. Тематик ел кысаларында язучының әсәрләрен тулысынча бастырып чыгару, аның әсәрләре буенча театр куелышлары, шулай ук аның иҗади мирасын багышланган чаралар үткәрү планлаштырыла.
Бюстны ачу шулай ук РФ Президенты Указы белән игълан ителгән Россия халыкларының бердәмлеге елы кысаларында оештырылды.