Түбән Новгород өлкәсендә «Түбән Новгород сылуы» татар кызлары бәйгесе уза
Скопировать ссылку
Түбән Новгород өлкәсе татарлары милли-мәдәни автономиясе талантлы татар кызларын IV өлкә «Түбән Новгород сылуы» конкурсында катнашырга чакыра. Бу хакта автономиянең ВКонтакте социаль челтәрендәге төркемендә хәбәр ителә.
Бәйге 13 февральдә «Түбән Новгород сылуы – 2025» җиңүчесе Җәмилә Җамалетдинованың авылы – Пилнә округы Кызыл Тау (Сафаҗәй) авылы мәктәбендә узачак.
Конкурсант кызларга түбәндәге таләпләрне үтәргә кирәк булачак:
- Үзе һәм туган ягы («Татарлыгым – горурлыгым») турында сөйләргә;
- Махсус операция хәрбиләре өчен үз куллары белән файдалы бүләк әзерләргә (кулъяулык, оекбаш һәм башкалар);
- Иҗади номер тәкъдим итәргә (җыр, бию һ.б.);
- Яхшы хуҗабикә булуын исбатларга («Хуҗабикә») һәм яраткан милли ризыгын әзерләп күрсәтергә;
- Милли костюм киеп дефиле тәкъдим итәргә.
Бәйгенең бер өлеше — игелек акциясе. Барлык әзерләнгән ризыклар һәм кул эшләре хәрби госпитальгә махсус хәрби операция катнашучыларына җибәреләчәк.
Конкурста катнашу өчен гаризалар 1 февральгә кадәр сылтама аша кабул ителә.