Түбән Каманы Яңа елга бизәргә әзерләнәләр
Быел Түбән Камада электрлаштырылган тукталыш павильоннарын, скверларны, бульварларны һәм променадларны гирляндалар белән бизәячәкләр. Шулай ук халык соравы буенча «Гаилә» үзәк паркы бизәләчәк. Кышкы бәйрәмнәрдә шәһәрне бизәүдәге яңалыклар турында район башкарма комитеты җитәкчесе Роман Булатов сөйләде. Бу хакта https://tat.e-nkama.ru/ хәбәр итә.
«Әгәр һава торышы яхшы булса, «Гаилә» паркында боз сыннары һәм лабиринтлар ясаячакбыз, яшүсмерләр һәм өлкәннәр өчен ике сертификацияләнгән тау куябыз. Шулай ук нәни балаларыбыз өчен боз тавы урнаштырабыз. Тау «Нефтехимиклар» паркында да булачак», - дип уртаклашты Роман Булатов.
Шәһәр паркларында чыршыларның каркаслары җыелган инде – хәзер белгечләр аларны бизәү белән шөгыльләнә. «Узган елдан калган уенчыкларны 10 декабрьгә кадәр урнаштырырга планлаштырабыз. Яңа элементларны 20 декабрьгә кадәр урнаштырырга тырышабыз», - диде район башкарма комитеты җитәкчесе.
Шәһәр күбесенчә неон стилендә бизәлә, шул исәптән Түбән Кама проспектларында яңадан бензол боҗралары барлыкка киләчәк. Шәһәрне бизәүгә гадәттәгечә зур предприятиеләр дә кушылачак.
Шәһәр хакимияте эшмәкәрләр һәм сәүдә биналары милекчеләреннән, халыкта бәйрәм кәефе булдыру максатыннан, керү төркемнәрен һәм витражларны гирляндалар һәм башка элементлар белән бизәүләрен сорый, диелгән хәбәрдә.