Җәмгыять 30 март 2024 20:47

Түбән Камада яшәүчеләр «Ак каен» мәчете территориясендә узган өмәдә катнашты

Скопировать ссылку

Түбән Камада яшәүчеләр «Ак каен» мәчете территориясендә узган өмәдә катнашты. Бу хакта «Туган як» хәбәр итә.

Шәһәрдәге өченче мәчет — «Ак каен» төзелеше дәвам итә. Имам Рәйхан хәзрәт җитәкчелегендә 20гә якын кеше төзелеш материалларын урнаштырды, чүп-чар җыйды, территорияне тәртипкә китерде. Бүгенге көндә «Ният» хәйрия фонды акчасына мәчет идәннәрен җәю эшләре башланды.

Сүз уңаеннан, узган атнада мәчет бинасына җылылык биргәннәр иде. Сантехника эшләрен башкарган «Маяк-НК» компаниясе җитәкчесе Нәфис Ибраһимов сүзләренчә, тиешле органнардан рөхсәт алынган. Җылылык бирү белән, мәчет бинасында эчке бизәү эшләре башлана.

«Тик шунысы да бар, җылылык һәм су бирелү белән бергә, алар өчен түләү кәгазьләре киләчәк. Мәчет биналары дәүләт балансында түгел, аларны мәхәллә кешеләре үзләре тота. Төзелеш эшләре кебек үк, түләүләр халыкның игелеге, юмартлыгы хисабына бара», диелгән хәбәрдә.

#Түбән Кама

Сәхифәләр

Түбән Камада яшәүчеләр «Ак каен» мәчете территориясендә узган өмәдә катнашты