Түбән Камада Якутиянең «Ысыах» милли бәйрәмен үткәрү көне билгеләнде
Киләсе елда Түбән Кама Якутиянең милли бәйрәме «Ысыах»ны кабул итәчәк – чара 13 июньдә узачак. Бу карар Түбән Кама районы башлыгы Радмир Беляев белән Саха (Якутия) Республикасы башлыгы Айсен Николаевның эш очрашуы вакытында расланды.
Очрашуда бәйрәмгә әзерлек детальләре, шулай ук хезмәттәшлекнең яңа юнәлешләре турында фикер алыштылар. Радмир Беляев Түбән Каманың Якутск белән мәгариф һәм мәдәният өлкәләрендә тәҗрибә уртаклашуга, төзекләндерү проектларын һәм мастер-планлаштыруны тормышка ашыруга, туристлык башлангычларын үстерүгә кызыксынуын билгеләп үтте. Коммуналь хезмәтләрнең системалы эшенә, шул исәптән авария хәлләрен бетерүгә аерым игътибар бирелде.
Район башлыгы Түбән Кама һәм Якутск арасындагы элемтәләрнең күптән инде рәсми туганлашкан шәһәрләр статусыннан чынбарлыктагы уртак эшкә күчүен ассызыклады. Гамәлдәге юл картасында җиде юнәлеш буенча 31 чара каралган.
«Бу хезмәттәшлек ике як өчен дә файдалы булыр дип ышанам», – дип билгеләп үтте Радмир Беляев.