Түбән Камада Әхсән Фәтхетдинов иҗатына багышланган яңа мурал ачылды
Түбән Камада «Кам-ОН» артпрограммасының унынчы муралы булдырылды. Яңа артобъект Түбән Каманың үзенчәлекле рәссамы Әхсән Фәтхетдинов иҗатына багышлана. Бу хакта https://nkamsk-rt.ru сайтында Алмаз Кашаев яза.
«Балачакка тәрәзә» муралы Татарстанның Халык рәссамы яшәгән Мәктәп бульварындагы 8 нче йорт каршындагы йортның фасадын бизи. Күләмле картина белән беренчеләрдән булып, шәһәр өчен гадәти булмаган яңа форматта уза торган экскурсиядә катнашучылар танышты. Мондый экскурсияләр бу җәйдә старт алган иде.
«Мин бүген яшьлегем буенча уздым. Бүген караган нәрсәләрнең барысы да минем күз алдында, мин әле Комсомол булганда төзелгән иде, шуңа күрә мондый экскурсияне оештырганыгыз өчен зур рәхмәт», — дип рәхмәт белдерде Түбән Кама аксакаллар шурасы рәисе Васил Камалов.
«Кам-ОН» арт-программасының юбилейлы унынчы муралында рәссамнар Әхсән Фәтхетдинов музееның ике яшь кунагын: рәссамның картиналарын игътибар белән карап торучы малайны һәм кызны сурәтләгәннәр. Бу символик ишарә киләчәктә үткән заман мирасын кадерләп өйрәнүләрен чагылдыра.
«Без аның картиналарының күчермәсен генә ясауны максат итеп куймадык, ә аның эшләрен тагын да зуррак форматта биреп — ул бик яраткан шәһәргә бүләк ясарга булдык», — дип аңлатты Мәскәү рәссамы Алексей Таракин.
«Әхсән Фәтхетдиновны хәтерләгән һәм хөрмәт иткән шәһәргә, аның халкына, «СИБУР» га зур рәхмәт әйтәсебез килә», — диделәр Әхсән Фәтхетдиновның сеңелләре Гөлнара Гайсина, Гөлшат Газизова.
«Кам-ОН» арт-программасының юбилей муралы шәһәребезне төзүдә турыдан-туры катнашкан рәссам иҗатына багышлануы символик мәгънәгә ия. Әхсән Фәтхетдинов картиналары күп кенә социаль объектларны бизи. Бу эшләрне күреп, үткәннәрне күз алдына китерәсең һәм Түбән Каманың киләчәге чыннан да якты булачагын аңлыйсың. Кеше үткәнне хәтерләгәндә, аның киләчәге дә булыр дип юкка гына әйтмиләр бит», — диде Түбән Кама шәһәре мэры урынбасары Марина Камелина.