Түбән Камада 446 миллион сумлык балалар поликлиникасы төзелеше тәмамланып килә
Түбән Каманың 35а микрорайонындагы балалар поликлиникасы төзелеше тәмамланып килә. Әлеге әһәмиятле объект төзелеше ярты ел элек башланган иде.Хәзерге вакытта монтаж эшләре тулысынча төгәлләнгән, бинаның фасады тышлана. Параллель рәвештә эчке бизәү эшләре алып барыла. Су белән тәэмин итү, канализация, вентиляция һәм электр челтәрләрен дә кертеп, барлык коммуникацияләр үткәрелгән. Бу хакта Түбән Кама муниципаль районының рәсми сайтында хәбәр ителә.
Поликлиника тирәсендәге территорияне төзекләндерү эшләре актив алып барыла. Керү юллары бетонланган инде, хәзер асфальт һәм брусчатка җәелә. Территория тирәсендә төзүчеләр 3D койма монтажлый. Булачак поликлиника янындагы яшел зоналарда яшь газон үләне үсентеләре барлыкка килгән инде.
Яңа поликлиника 2024 ел ахырына кадәр ачылыр дип көтелә.
Булачак медицина учреждениесе тәүлегенә 200 кеше кабул итә ала. Анда участок педиатрлары кабинетлары гына түгел, температуралы кешеләрне кабул итү зонасы, анализлар алу, ашыгыч ярдәм кабинетлары, рентген аппараты да урнашачак. Моннан тыш, биредә балалар сәламәтлек үзәге һәм сөт ризыклары бирү пункты эшләячәк.
Төзелеш «Сәламәтлек саклау» илкүләм проекты ярдәмендә башкарыла. Проектны гамәлгә ашыруга 446 млн сум бүлеп бирелгән.
Яңа балалар поликлиникасы Түбән Камада өченче булачак. Гамәлдәге ике поликлиника 58 меңнән артык балага хезмәт күрсәтә. Яңа поликлиника яңа микрорайоннарда яшәүче балаларны беренчел медицина ярдәме белән тәэмин итәчәк.