Түбән Камада 20 ишегалды хоккей корты һәм 7 шугалак ачылачак
Эшлекле дүшәмбедә Түбән Кама районының Физик культура һәм спорт идарәсе җитәкчесе Марина Иванова 2025/2026 елгы кышкы сезонга әзерлек планын тәкъдим итте. Ул билгеләп үткәнчә, шәһәр алдан ук халык өчен кыш айларында актив ял итү инфраструктурасын әзерли. «Һава торышы планнарыбызга комачауламас, дип өметләнәбез», - дип ассызыклады Марина Иванова.
Әзерлек кысаларында 20 ишегалды хоккей кортын ясау планлаштырыла. Мәйданчыкларда микрорайоннарда яшәүчеләр килеп шуа алачак. Шулай ук биредә ишегалды хоккей клубларында шөгыльләнүче балалар өчен дәресләр үткәреләчәк.
Моннан тыш, кышын 7 шәһәр шугалагы эшләячәк: «Гаилә», «Нефтехимик» һәм «Сабантуй» паркларында, «Шинник» спорт комплексы территориясендә, «Батыр» спорт мәктәбендә, шулай ук Кама Аланындагы «Нефтехимик» һәм «Олимпия» боз ареналарында. Массакүләм шуулар «Нефтехимик» һәм «Олимпия» сарайлары бозларында оештырылачак.
Презентация: Түбән Кама районы матбугат хезмәте
2024 елгы мәгълүматларга караганда, Түбән Кама районының спорт объектлары белән тәэмин ителгәнлек дәрәҗәсе 57,5 процент тәшкил итә. Бу Татарстандагы уртача күрсәткечтән (72,5 процент) азрак. Әлеге күрсәткеч районда спорт инфраструктурасын үстерүне планлаштыруда төп юнәлеш булып торган.
«Шул ук вакытта без җәмгыятьнең зур потенциалын һәм ихтыяҗын күрәбез: Түбән Камада яшәүче кешеләрнең 64,3 проценты сәламәт яшәү рәвеше алып бара. Безнең бурыч – һәр гаиләгә, һәр кешегә физик культура һәм спорт белән шөгыльләнү өчен заманча мөмкинлекләр булдыру», - диде Марина Иванова.