Түбән Кама Халыклар дуслыгы йорты 10 еллык юбилеен билгеләп үтте
Түбән Кама Халыклар дуслыгы йорты 10 еллык юбилеен билгеләп үтте. Бу көнне Халык иҗаты йорты фойесы дистәләгән милли берләшмәләр өчен уртак йортка әйләнде. Теләсә кайсы милләтнең күркәм традициясе буенча, бәйрәм кунакларын сый өстәлләре каршы алды, дип яза «Туган як» газетасы.
Милли берләшмәләр вәкилләре — татарлар, башкортлар, үзбәкләр, таҗиклар, әрмәннәр, чувашлар, удмуртлар, дагыстанлылар үзләренең милли сыйларын әзерләгәннәр — артык зур булмаган мәйданда чын гастрономик сәяхәт ясарга мөмкинлек булды.
Биредә шулай ук татар халкының милли ризыкларына багышланган өстәл дә бар иде. Анда Бөтендөнья татар конгрессының Түбән Кама бүлеге «Ак калфак» җәмгыяте ханымнары милли ризыкларыбызны тәкъдим иттеләр.
Гамәли сәнгать, чигү, рәсем сәнгате буенча осталык дәресләре дә оештырылды. Теләгән һәркемне милли һөнәрләргә өйрәттеләр.
Халыклар бердәмлеге көне һәм Түбән Кама Халыклар дуслыгы йортының 10 еллыгына багышланган бәйрәм концерт залында дәвам итте, сәхнәдән шәһәр халкын муниципаль район башлыгы, шәһәр мэры Рамил Муллин котлады. «Бердәмлек һәм иҗат һәрвакыт дәвам итсен. Бу күркәм традицияләрне, тарихны буыннан-буынга тапшыру мөһим. Мин әлеге эшләрдә башлап йөрүче барлык җитәкчеләребезгә, милли берләшмәләргә рәхмәт белдерәм», — диде ул.
Бәйрәм уңаеннан оештырылган чарага Казаннан зур делегация килде. Алар арасында Татарстан икътисад министры урынбасары Гөлназ Исмәгыйлева да бар иде. Ул хезмәттәшләре белән бергә Халыклар дуслыгы йорты хезмәткәрләренә, милли берләшмәләр вәкилләренә, халык ансамбльләре җитәкчеләренә һәм артистларына Рәхмәт хатлары тапшырды, диелә хәбәрдә.