Түбән Кама педагогика көллияте Нәкый Әхмәтшин исемен йөртәчәк
Түбән Камада педагогика көллиятен ремонтлау дәвам итә, аны төзү инициаторы шәһәрнең мактаулы гражданины Нәкый Әхмәтшин була. Иҗтимагый советның чираттагы утырышында мәгариф системасының җирле ветераннар оешмасы учреждениегә нәкъ менә аның исемен бирергә тәкъдим итте. Бу хакта Түбән Кама муниципаль районы рәсми сайтында хәбәр ителә.
Тукай урамындагы хәзерге уку йорты урнашкан бина 1970 елда файдалануга тапшырылган. Педагогия училищесы Түбән Камада 1981 елда ачыла. Бүгенге көндә аны комплекслы яңарту бара.
Түбән Камада 1967-1974 елларда Нәкый Шәйхетдин улы – 1 нче урта мәктәп директоры, 1974 елның июненнән 1986 елның августына кадәр шәһәр халык мәгарифе бүлеге мөдире булып эшли. Эшләгән чорында ул мәктәпләрнең, мәктәптән тыш һәм мәктәпкәчә учреждениеләрнең укыту-материаль базасын ныгытуга зур игътибар бирә.
1986 елның августыннан лаеклы ялга киткәнче Нәкый Әхмәтшин Түбән Кама педагогия училищесы каршындагы база мәктәбе директоры булып эшли. Ул шәһәрнең иҗтимагый тормышында актив катнаша. Сугыш һәм хезмәт ветераннары шәһәр Советы Президиумы әгъзасы итеп сайлана. Аның инициативасы белән халык мәгарифе хезмәткәрләренең тармак ветераннар оешмасы оештырыла.
Нәкый Шәйхетдин улының халык мәгарифе музее көллиятнең горурлыгы булып тора, аны ремонт барышында беренче катка күчерергә һәм уку йортының визит карточкасы итәргә тәкъдим ителде.
«Бездә әле дә 1981 елдан бирле Нәкый Шәйхетдин улы белән бергә эшләгән укытучылар эшли. Ул безнең өчен чын укытучы, остазлар остазы иде. Аның истәлегенә күп чаралар үткәрәбез. Безнең барлык студентлар һәм яшь укытучылар аның турында белә. Әгәр дә без көллияткә Нәкый Шәйхетдин улы исемен бирсәк, аның турында шәһәрдә генә түгел, ә республика һәм федераль дәрәҗәдә дә беләчәкләр, чөнки без еш кына зур чараларда катнашабыз», - диде педагогика көллияте директоры Рәзинә Астадурян.
Очрашуда катнашучылар бертавыштан педагогларның инициативасын хуплады һәм аны раслау мәсьәләсен эш планына керттеләр.